延苑韓國料理 (已結業)

星期日，去聯和墟揾食，去到都4-5PM，出名拉麵冇開，群記豬手關門。下次要早上再來了。係聯和墟行左陣，記起OPENRICE有間韓國料理，食評不錯。不過，冇抄低地址，行來行去都揾唔到，最後問人，原來係帝庭軒對面。門面唔起眼，入對去，好多Hello Kitty裝飾，但又唔係好靚，亦都唔搭配。坐底左，有位女服務員介紹餐牌食物，幾好招呼喎~~不過，我同屋企人冇叫2人餐，叫左:辛辣豬肉飯$52--幾野味，可以選大中小辣，要左中辣，用來送飯幾開胃架。浦項水晶粉$52--好食架，唔似一般food court炒埋一堆就上枱，本來唔想叫的，因為就係怕佢油膩，但呢碟入口唔油架喎，幾好食。再講下D餐前小食十款(任添)，我地有再添，但其實唔同款架，即係唔止十款lo。十多款小食，都不過不失，係有一款銀魚仔唔好食，咬唔到架。另外，有三款飲品，菊花茶/豆漿/麥米茶，個阿姐不停咁幫你添，但佢又會差不多記得晒成間鋪的客人飲邊款喎，阿姐D記憶力好抵讚。我飲左好多杯菊花茶，又夠凍，正。最後，仲有涼粉送，幾滿足。主菜，其實是一般味道。最好是服務和任食前菜和任飲的菊花茶。