好彩海鮮酒家 (已結業)

多得酒樓有早巿特價時段，多咗食早餐的選擇，唔使吓吓去茶記或快餐店。早巿食個咸魚肉片煲仔飯加個點心，足夠應付去郊遊所需。煲仔飯熱辣辣，飯粒分明，軟硬適中，塊咸魚比想像中大件兼唔係死鹹。煎釀茄子、煎金粟魚餅、乾蒸牛肉都有特價，乾蒸牛肉個樣雖然歪歪斜斜，味道係三個之中較好。正價點心叉燒腸，皮薄得嚟叉燒多，甜豉油味道啱啱好，喜歡；芝麻煎堆仔內有蓮蓉，甜度適中，一定要趁熱食。樓面職員數目少，但佢哋好有 team spirit ，互相補位極有默契，做嘢超勤快，默默冇停手咁開工，真心大力給讚！