清溪川韓國食堂 (已結業)

前兩個禮拜去左隔離果間X園，啲服務真係「好」到令人想像唔到……於是同友人試吓呢間，入到去發現啲服務員係疑似一家韓國人。睇食評啲人話佢服務差，但我完全唔覺得。雖然個女人同個男仔都係木口木面，但係我諗極有可能係因為佢地廣東話唔好，所以唔識表達以致有咁嘅問題。我同友人兩個人叫左四樣嘢食：酢醬麵、海鮮煎餅、燒牛骨肉、炒年糕。酢醬麵 - 好清淡，友人話鹹啲好，但呢個味道我又覺得ok海鮮煎餅 - 太厚粉，麻麻地燒牛肉 - 薄薄的，幾好味炒年糕 - 味道唔太辣，適合一般港人口味啲嘢食全部都好大碟，一向大食嘅我都食唔晒囉～個酢醬麵我夾左４次，友人夾左１次，都仲有三份一響度，於是打包返屋企。服務其實真係唔錯，我地兩個人霸左張四人台，佢又無趕人走。而且個男仔都成日主動幫我地加茶。有一下個男仔以為我要order，明明轉左身都即刻調返轉頭，值得一讚啦！隔離果間？唔主動加茶不特止，叫佢加仲黑口黑面。呢間個男仔侍應唔曉講廣東話斟茶都曉講Excuse me啦。不過呢度個抽風系統真係有待改善，個廁所要出一出後巷再轉入去都係問題。但個廁所就好乾淨囉。