華苑酒家 (已結業)

今日入開朗屏開會，就搵埋係附近住嘅2位朋友去食野。佢地都介紹呢間華苑酒家食蒸氣粥底鍋。華苑酒店距離地鐵站不遠，係朗屏E出口再行4分鐘就見到好大個招牌，相當易搵。蒸氣鍋 （成人：$268 小童：$168）每檯包4款海鮮，任飲（有汽水有啤酒）任食，我地3個就叫左鮑魚，象拔蚌，大元貝，海蝦。呢度有職員幫你放食材到蒸鍋，set時間，分菜，好細心。呢度嘅海鮮係極力推薦俾大家，超新鮮，每款海鮮都唔洗點醬汁都好鮮甜。海蝦嘅蝦肉好實正，好彈牙，推介！鮑魚，象拔蚌同大元貝都好好食，款款都好大隻，而職員好好管理蒸嘅時間，唔會令食overcooked。食完海鮮仲可以點d配菜黎蒸 （蔬菜要自行到出面凍櫃拎），雖然配菜選擇唔多，但勝在特別。我地都叫左比較特別嘅污糟雞，和牛粒，和牛肉，梅菜肉丸...黎試，味道唔錯，都值得一試。和牛粒就推薦大家一定一定要食，因為真係好好食，入口即溶，好有牛嘅味道，所以我地都encore左一round。唔夠飽仲可以叫d糕點黎食做甜品，而我地就叫左馬粒糕，自己蒸嘅感覺好特別。最黎就食埋個由頭先d食材嘅精華淆成嘅粥，滿足。Overall 都滿意餐廳環境，食物質素同服務。