好好運快餐店 (已結業)

終於有機會黎朝聖人氣快餐店沙嗲牛麵餐$52 自選左2個款餸紅腸加煎太陽蛋沙嗲啡，紅腸紅，蛋嘅黃白再加上點綴嘅蔥花綠，一嚟到個樣已經好靚仔，張相唔駛執都已經可以出Post。試下係未咁有內涵！？嘩！份量十足，太陽蛋有燶邊有流心，厚切紅腸炸過有口感，海量牛肉配上濃稠沙嗲汁，牛肉爽滑嫰，沙嗲汁真係心機之作，有洋蔥甜同花生香，再以濃稠姿態掛上由細食到大嘅大光麵上，介乎沾麵與湯麵之間，每口掛上滿滿幸福，非常滿足，這價錢我覺得物有所值！另外再加多份奶醬多 $17，個人好怕以厚多士做奶醬多，實在浪費了奶醬同麵包！呢度個厚度就perfect match，多士烘得香脆，再加上香滑花生醬同煉奶，完美比例，每口都係食得出整體性及融和度！人氣店果然係人氣店，聞名不如見面！始終都係快餐店同食飯時間，記住食飽飽就要埋單走人啦！