黑木 (已結業)

尖沙咀韓國街除左韓國餐廳，附近都有一間隱世日式串燒店。主餐牌雖然得⼀頁，但各種海鮮，肉類，菜類，小食，麵食都有。除左主餐牌既野食之外，呢度都有廚師特別推介。首先係海鮮類，要左份海膽燒元貝，將兩樣我最愛嘅海鮮放埋一齊，實在係太期待，果然實物亦都冇令我失望。帶子嘅size好大，用蛋黃醬一齊燒完都冇掩蓋本身嘅鮮味，上面再放烤過嘅鮮甜海膽，放上白麵包上面一齊食勁滿足。然後要左燒雪場蟹腳，雪場蟹嘅蟹腳有幾鮮甜唔使講，蟹柳燒過之後再加多份焦香，配合清新既柚子醋汁，貴啲都係值得嘅。海鮮部份仲有燒銀雪魚，銀鱈魚加左燒汁燒到表面金黃色，魚肉肥美滑溜，入口即溶，加埋中和甜膩既沙律醬，人間美味。食完咁多海鮮係時候食返啲肉，首先要左份黑豚肉，豬肉加咗孜然粉，食落好香口。而且黑豚肉嘅脂肪比例啱啱好，完全唔乾。最後有萵荀釀雞翼，雞翼拆晒骨之後釀入萵筍條，燒到完全冇晒脂肪嘅雞皮好香脆，但雞肉仍然保持到多汁嫩滑，加埋鮮甜爽脆嘅萵筍，呢個配搭真係好好。下次會再嚟試下其他食物。