茶餐廳2.0 (已結業)

好耐之前見人哋食茶餐廳2.0個甜品好吸引，所以一直心掛掛好想去試吓，今日終於有機會啦！呢間舖位都幾大，部份係室外地方，夜晚人流唔多，室內環境都唔錯。食物選擇都多，中式和西式都有，近日仲推出冬日2.0暖笠笠煲，有雞煲、魚煲或者羊腩煲可以揀，之後仲可以追加配料打邊爐，我諗天氣再凍啲食呢個就一流啦！最後選擇左一個西式嘅二人套餐（$268 ），有龍蝦湯和煙鴨胸雜菜沙律，龍蝦湯唔係好杰身嗰啲，不過都有龍蝦味，另外個煙鴨胸沙律就好大碟，比你哋share食，鴨胸份量都幾多，加埋沙律醬，味道幾好。主菜有意大利飯或者天使麵二選一，我哋就揀咗西西里茄蓉鮮蝦天使麵，份量都幾多，啲蝦都幾大隻，加埋三色椒和菇等等，味道不錯。另一個主菜就可以揀羊架或者德國鹹豬手，我哋就揀咗法式香煎羊架配薯菜，仲有3支骨，肉好多，羊脂羶味洋溢，好好味，同行朋友話想食多件。附送嘅薯角好多好大條，加埋其他蔬菜啱啱好。個餐都附有飲品，凍飲加$3。最後最後，當然有我期待已久嘅甜品啦！選擇左雪糕鮮果雞蛋仔（ $58 ），新鮮即製，一底雞蛋仔上面加上忌廉和一球雪糕，仲有藍莓和士多啤梨朱古力醬點綴，雞蛋仔夠脆，配埋雪糕真係冇得彈啊！