茶匠 清水一芳園 (已結業)

睇飲食報導知道日本嘅清水一芳園進註沙田，d相影到佢地嘅蕨餅好吸引，粒粒分明，抹茶粉、黃豆粉分佈亦十分均勻，睇見都想食！嗜甜嘅我不嬲好鍾意食QQ嘅嘢，尤其係蕨餅，所以難得有機會去開沙田，梗係要試一試新店啦！去到見到雪櫃放滿蛋糕甜品，counter亦有日式甜點如大福、丸子等，見到我嘅目標--蕨餅，佢係用透明膠盒pack好晒，有抹茶味、黃豆味或雙拼，售$50一盒，每盒約有十數粒，難得嚟到梗係一次過試晒兩隻味啦，我揀雙拼！眼見每盒盒蓋都佈滿水氣，攞上手仲係冰凍，心諗唔知係咪啱啱喺雪櫃攞出嚟，有一刻遲疑，但因趕時間，所以快手買一盒試。經過個零鐘頭車程諗住應該已融雪，好心急開嚟食，盒蓋霞氣無晒，淨番水珠，但濕氣落晒去蕨餅粉度，尤其是抹茶味，d粉黏成一舊舊，黃豆粉相對無咁濕，食落去抹茶味好夠濃，但裡面嘅質感咬落略嫌較實，反而黃豆味較Q彈，理論上應該係一樣嘅蕨餅底料，只係拌入唔同咪味嘅粉，但唔知係咪始終倒汗水稍有影響，搞到我好失望。相信今次只係一時閃失，希望店家留意倒汗水嘅情況，加上打開個膠盒時要用相當嘅力，應該幾密封，如果可以用個蓋冇咁實淨嘅盒通吓氣，或者購買時先至入盒，唔知會唔會好d呢？