美味廚 (已結業)

响食街既美味厨己開業超過15年，有段時時間招牌排骨因質素下降無繼續幫襯，事隔多年，今次再去試下： 紅燒牛筋麵：牛筋炆得剛好，唔會太 "淋" 或太硬，有口感，亦保持原有黏性，天然骨膠原喎，女性恩物！ 豆漿：味道OK，唔算太甜！ 酸辣湯 + 排骨菜飯套餐：- 酸辣湯：味夠酸辣，料足！- 排骨菜飯：唔可以話佢差，排骨質素確實比前段時期提升左，但無論食味及鬆軟度都未返最佳狀態既水平。10幾年前一咬落件排骨度，感覺異常鬆軟，加上佢係比較厚身，食落不但有口感，仲有好香既薑葱味，令人難忘！記得當時仲係舊裝修，厨房响門口左手邊，但對街窗口被貼上一層白色膠紙，阻隔客人從門口玻璃直望厨房。但我會响等位既時間用單腳企响牆身好幼既石膊，再用手摸住玻璃平衡，眼晴便可越過白膠紙高度睇下師傅煮食既情況，有一次真係見到師傅一絲不苟將豬排揼鬆。註：食物質素有變，但侍應們仍然嘈吵，無論為客人放食具或內部溝通，果然十年如一日不變。