峇里餐廳 (已搬遷) 新店位置

同事推介此餐廳，網上食評亦唔錯，今日下午專誠與老公到此撐枱腳。店面大，裝潢有點印尼風格，座位間距合理，中午1點，只有一半入座率。午餐價格由5X至6X蚊，未計加一。兩人各點了一個午餐：巴東牛肉飯，黃薑飯，各包一杯飲品。餐到後，老公見到份量較少，餸亦不多，於是追加了一個醬菜蛋豆腐。巴東牛肉用的是牛展，炆得很淋，味道亦唔錯。黃薑飯用米唔係我鍾意果隻，幼長偏硬果隻米，餸有兩件咖哩雞，一片巴東牛，混有豆腐薯仔的豬肉粒(只有一粒仔豬肉)，而且上碟是將3樣餸放埋一齊，醬汁味道混埋一齊。我在另一間食黃薑飯是用蕉葉上，飯在中間，三樣餸分別圍在旁邊，再加蝦片，花生，什菜，都係6X蚊，所以相比下呢間就做得好行貨。醬菜蛋油味很重，芽菜很少，碟面是偏硬的米餅唔係蝦片，醬汁無蝦醬和花生香味，味道一般。諗住係幾十年老店，所以有期望，亦容易失望。我始終認為尖沙咀和銅鑼灣果兩間印尼老店水準高得多。