炉端金 (已結業)

男友人生日，佢屋企人安排黎呢度慶祝，食過話評價幾好，生日者有半價。入到去安排我哋坐一個位都幾入嘅，係廁所隔離，嗰個位係好難叫到侍應過黎，就算叫到啲侍應好似未瞓醒咁，啲點餐紙由A至K咁排，逐份釘住，啲釘好易拮到手囉。一行6人好快就劃好哂交紙，啲野黎得算快而且無漏單。首先黎嘅係刺身，的確好新鮮，忍唔到口食左好多，但個wasabi無咩味，食到尾發現好多我地無叫嘅都砌埋落個刺身拼盤度，可能為左豐富視覺掛。然後黎左堆串燒，推介燒牛舌同燒冬菇，encore左幾次，雞皮得我一個食，好味，燒得好脆。食到中途無啦啦上左個長腳蟹，侍應冷言冷語咁話送嘅就擺底左，蟹肉有鮮味不過有啲太咸。循例都叫左啲壽司，舊飯太大了，比例唔啱。想叫烏冬食，但係得拉麵，無得轉烏冬，咁就無食到。另外仲有movenpick同haagen dazs雪糕作結。