滇川雲南小鍋米線 (已結業)

木嘴最近食米線食到上癮，去親邊區都想發掘下有咩食肆有米線食。今次再次黎到粉嶺，喺openrice見到呢間米線評分唔錯，於是決定入去一圓米線夢。有睇開木嘴食評既大家應該知我鐘意食辣，去食米線其實醉翁之意不在米線，而在辣。木嘴最後叫左個麻辣腩肉小辣，木嘴朋友就叫左個酸辣腩肉雲吞小辣。木嘴一食個麻辣腩肉米線，真心以為佢上錯。點解完全無辣味既？仲要係連麻辣既香都無，真係幾失望下。酸菜呀芽菜呀幾豐富既，至於腩肉都好食既，不過份量唔多，每片都薄過張紙，盡show廚師刀功。至於朋友碗酸辣腩肉雲吞小辣，感覺上辣過碗麻辣，而且香D味道出D。不過，呢碗只係相對木嘴果碗叫好D，總括黎講話好好食又唔係。不過隻雲吞就幾大隻同幾好食既，挽回返D分數啦。木嘴本身為左一圓自己既米線夢而黎食，但其實碗米線真係幾普通，食完完全無滿足既感覺，所以夢一直都在，唯有下次再搵另一間啦。當然，如果閣下其實只係想搵D野食醫下肚又完全無要求既話，呢間米線都食得過既始終價錢唔貴又包食得飽。