萬發海鮮火鍋菜館

營業中

休息中

幾間分店無疑呢間算係坐得最舒適，但舖頭位置亦認真刁鑽，想撞到熟人都難。舖面主要做啲6人以上大枱，仲有一層喺樓上。到場前，有食到懷舊菜嘅期望，嚟到聽到侍應介紹招牌菜居然只係薯仔炒牛柳⋯⋯冇話係用和牛呀⋯⋯咁有「創意」嘅推介，咁我點番啲家堂菜算。咁多碟餸最交到差係石鍋啫啫通菜，叫做夠鑊氣，只係鹽花重手咗些少可接受。小炒皇調味算適中，係啲蝦乾浸得唔夠時間，硬過我條命。金牌風沙雞說穿即炸子雞，冇如圖嗰種「風沙」炸蒜，雞仲係保留雪味，普通酒樓圍餐炸子雞質數。龍躉兩食當中只係有西蘭花伴碟嗰碟易入口，另一碟蒸龍躉頭腩腥到不堪，食一舊已想𦧲⋯⋯豉椒炒花甲啲花甲僅屬蜆仔大細，而且4分1係唔開殼，夾得無癮。此時友人講話另一分店小炒做得好好多，不過經已冇咩心思再去試。