嚐味喇沙 (已結業)

沙田中心早前大裝修，呢間「嚐味」都係最近先開，是日星期六，午飯時間都見好多人排隊，心諗味道應該唔錯，打算試下。既然呢度咁出名食喇沙，就梗係試下啦。喇沙有兩款可以揀，分別係「雜錦喇沙龍蝦湯拉麵」同埋「扎肉喇沙龍蝦湯拉麵」。套餐包湯或者咖啡或茶，你亦都可以選擇加$8轉特飲。除此之外，仲可以以$10-$15 加小食添。麻麻地喜歡飲湯既我，揀左要特飲，叫左話梅柑桔梳打。加入左話梅柑桔既梳打水，大約有半杯係冰，起初飲會有D過甜，但係隨著冰慢慢溶，甜度開始轉淡，到中段時味道係剛剛好既。以上既泰式魚餅只需要加$12，雖然份量極為迷你，味道同賣相亦都唔叫特別吸引，但係以呢個價錢黎講有咁既質素都算係咁架啦。「扎肉喇沙龍蝦湯拉麵」賣相真係非常一般，湯底顏色略淺，味道極淡，真係分分鐘買即食喇沙湯麵返屋企煮都仲好味。不過配料都算多，除左扎肉之外都仲有豬頸肉，蛋，豆卜同埋蝦，又未至於真係不能下嚥既。