くまちゃん温泉

營業中

休息中

之前行過見到好吸引，就排隊諗住試吓囉，但有個木口木面四眼阿叔走出嚟話熊仔賣晒。我哋好有誠意，第二日早成個鐘再嚟排隊，同一個四眼阿叔又話啲嘢買晒。跟手我哋問佢可唔可以訂位，佢就水我哋打電話。我都覺得奇怪點解唔即時幫我哋落Booking，唔緊要，我咪打電話囉。點知明明舖頭有幾個員工，而且又唔係滿座，打咗n次冇人聽，我見喺附近，就行返過去想book餐廳。又係嗰個四眼阿叔走出嚟，串我話依家忙緊咪冇人聽囉。 我當場啞咗，心諗乜料咁嘅態度。之後條友叫我等等，睇住佢行嚟行去，催其他客人快啲埋單走，但又唔係做嘢，係唔諗住招呼我。 結果係有個後生少少嘅員工同我講唔好意思，幫我落Booking，不停道歉話佢哋短手。之後嗰個四眼阿叔先至走過來，睇住佢個同事幫我寫電話，嗰個眼神擺明唔想做我生意。然後上嚟OpenRice，好安慰見到原來好多人有同一見解，唔係我個人問題，唔係我嘅主觀感受。 我睇大叔就唔似係老闆，正常老闆唔會咁趕客，除非佢想快啲執笠；如果間餐廳有個咁嘅員工，我諗間嘢好快都唔使做。你短手我明白，但客人不是你出氣對象。