香港永年車仔麵茶冰廳

營業中

休息中

初三去沙田唔係去搵車公，而係食呢一個本地情懷車仔麵。睇咗某電視台做嘅茶餐廳節目，令到成家人更加想趁好嘅茶餐廳喺度嘅時候是多啲去食多啲。今日揀咗呢間係因為佢排名高，叫咗一個女神麵、兩個大碗麵，其中一個加咗甜酸齋同埋BB辣，嘢飲當然要試吓佢嘅凍、熱奶茶。我叫咗河粉底，非常非常開心，因為佢幼身而唔會斷，自從十幾年前喺天后某清湯腩舖頭食到啱口味嘅河粉之後，今次係第二次再遇到食得開心嘅河粉。屋企人問我呢度啲河粉好食定文記嗰d好食，我比較唔到，因為叫文記十幾次都係外賣，送到屋企啲河粉已經冇堂食咁嘅texture。整體味道十分滿意，屋企人則希望湯底再濃一點，我就啱啱好。熱奶茶入口唔覺得飽滯，冇「浪」胃，唔知係咪好似金茶王咁用植物淡奶。menu有其他地道comfort food, 食完個車仔麵已經太飽，下次先食。