媽咪雞蛋仔 (已結業)

勁耐冇食媽咪，喺旺角行過見倒口痕又想食，原來而家成個門面都唔同晒，差啲唔認得。雖然有四五部夾雞蛋仔機，但因為都好多人幫趁，落單後都等左20分鐘先有。香蕉朱古力雞蛋仔＋朱古力雪糕($52) - 太耐冇黎，原來而家雞蛋仔都有超過20款唔同口味，仲有分鹹甜，格仔餅亦有幾款揀。以前次次黎都係食朱古力雞蛋仔，今次就試香蕉朱古力雞蛋仔，而家仲有得加$20加兩球雪糕，可以揀雲呢拿或者朱古力，我當然揀朱古力啦。雞蛋仔每粒都有朱古力醬喺入面，好濃朱味，不過香蕉味就唔太突出。雪糕朱味都ok，中間仲有朱古力碎喺入面，唔似係cheap雪糕，$20兩大球都唔算貴。不過唯一唔好係加左雪糕會令雞蛋仔變腍，亦唔方便逐粒搣黎食。特濃朱古力沙冰($33) - 除左雞蛋仔同格仔餅，媽咪而家仲有好多野飲賣，冷熱都有，選擇都唔少，價錢同一般茶飲店差唔多。哩杯特濃朱古力沙冰朱味好濃郁，沙冰打得好滑，完全冇碎冰，啱晒我哩啲朱迷。