東喜茶 (已結業)

之前試過內地網紅喜茶，見到香港都開咗間東喜茶就去試試。叫咗杯芝士四季春，唔可以走冰只可以少冰，另外甜度方面就可以揀正常，少甜，半甜。每杯芝士奶蓋飲料，店員會用半開嘅杯蓋，個人建議唔好用飲管品嚐芝士奶蓋，應直接用杯蓋品嚐奶蓋，咁樣先可以品嚐到真正奶蓋嘅滋味！由於奶蓋有一定厚度，飲嘅角度要再提高一D先可以飲到下面嘅茶，結果呢杯東喜茶同內地喜茶味道有9成相似，芝士奶蓋芝士味唔會太重，滿滿嘅奶泡帶有微微嘅芝士味，再加上茶嘅清甜，配合得天衣無縫。未試過嘅朋友，可以一試！