尚蓮越泰餐廳

營業中

休息中

自從冇得飛就好少會經過東涌了，尋日同朋友仔旺角行街行到太攰就求其搵架比較長途既巴士搭（為左訓個覺）😂於是就即興入左東涌。行左一陣東薈城，到左晚餐時間就順便係東薈城覓食。偶然經過呢間餐廳見到裝修幾靚就決定入去試一試。海鮮椰青焗飯🥥海鮮新鮮，蝦好彈牙，帶子都有少少甜，青口一啲都唔腥。椰汁味濃郁，飯就係炒底，所以係金黃色的，粒粒分明。同椰汁撈埋一齊食好好味！豬肉生菜包🥬泰菜必吃生菜包！呢個生菜包好出色，肉碎餡有微微辣好惹味，生菜新鮮，而且餐廳好貼心咁雪過啲生菜，所以包肉食既時候唔會燙傷，細心位加分！炭燒魷魚木瓜青芒沙律🥗魷魚太韌咬唔斷，咬到口都攰，最後都係吐出來。😅青瓜絲同青芒絲都好fresh，如果可以改善魷魚既情況就更好啦！泰式綠奶茶🍹呢個味道比較特別甜，茉莉花香精味比較重，朋友話有啲似廁所味😅總括來講呢間餐廳整體食物不錯，環境裝修靚，坐位闊落，食得幾舒服，係一次不錯既用餐體驗！