影片
更多
2014-07-02
1329 瀏覽
上次同幾個朋友去完荃灣廣場搵食，今回就嚟到大坡坊依邊，見間鋪名同小弟啲食評標題咁，鍾意玩食字 ，所以，特別有印象。依晚4人行人少少，一齊嚟食個晚飯，傾吓偈，交流一下飲食心得 。環境茶記格局，唔使多描述，以4人卡位居多，梳化櫈，但木板靠背，唔算太好坐，不過，茶記又唔喺食環境，預咗啦，重點喺啲嘢食平靚正嘅啫。早午市主要喺茶記模式，主打都喺啲早餐、麵餐、三文治餐、午餐、碟頭炒粉飯麵、常餐、下午茶餐……等等。當然碟頭炒粉飯麵、常餐就照例全日供應 。一到夜晚，碟頭炒粉飯麵當然都仲有供應，不過，就有多另一個小菜餐牌，所以，晚市亦銳意做晚飯小菜生意。菜式由湯類、雞類、魚類、鐵板類、煲仔類、小炒類、海鮮類、蔬菜類、蒸類…以至黑松露菜式 ；此外，亦加啲2、4人套餐可選。就算唔叫套餐，晚飯食小菜，都附送白飯，及飲品半價，變相加錢變套餐，不過，如果免費送多個老火湯就仲好喇，話晒城市人有啖湯水感覺窩心好多 ！ 招牌桶骨大白菜 $80 既然暫未有例湯送，當然叫番個招牌湯滋潤一下。成盆豬桶骨大白菜湯，份量可不少，足夠6個人飲，而最令人注目，莫過於幾件嗇巨型豬桶骨，大過個拳頭有多，而啲肉食落又唔嚡喎
環境茶記格局，唔使多描述，以4人卡位居多，梳化櫈，但木板靠背，唔算太好坐，不過，茶記又唔喺食環境，預咗啦，重點喺啲嘢食平靚正嘅啫。
早午市主要喺茶記模式，主打都喺啲早餐、麵餐、三文治餐、午餐、碟頭炒粉飯麵、常餐、下午茶餐……等等。當然碟頭炒粉飯麵、常餐就照例全日供應 。
一到夜晚，碟頭炒粉飯麵當然都仲有供應，不過，就有多另一個小菜餐牌，所以，晚市亦銳意做晚飯小菜生意。菜式由湯類、雞類、魚類、鐵板類、煲仔類、小炒類、海鮮類、蔬菜類、蒸類…以至黑松露菜式 ；此外，亦加啲2、4人套餐可選。就算唔叫套餐，晚飯食小菜，都附送白飯，及飲品半價，變相加錢變套餐，不過，如果免費送多個老火湯就仲好喇，話晒城市人有啖湯水感覺窩心好多 ！
招牌桶骨大白菜 $80 既然暫未有例湯送，當然叫番個招牌湯滋潤一下。成盆豬桶骨大白菜湯，份量可不少，足夠6個人飲，而最令人注目，莫過於幾件嗇巨型豬桶骨，大過個拳頭有多，而啲肉食落又唔嚡喎，當然，最重要個湯膽，奶白色嘅濃湯濃香柔順，有點點滑溜嘅感覺，大白菜又食落清甜，「招牌」之名都唔太流喎 ！
蜜桃醬燒蝦球 $78 海鮮類揀嚟依道燒蝦球，一身橙紅鮮艷，色澤非常搶眼。蝦球去殼拆肉，食起嚟比煎蝦碌方便，而且，採用大蝦啖啖肉份外滋味，加上蝦肉又挺爽口。咬落先知，蝦球包了一層薄薄粉漿，就好似做天婦羅咁，不過，添上蜜桃醬汁後炸漿已唔多脆，個人認為大可省略依個工序。反而幾鍾意個醬汁，雖知蜜桃喺罐頭貨，但酸甜度幾平衡，稀杰度又啱啱好 。
黑松露蝦仁蒸豆腐 $78 見到主菜牌中有一欄「極品黑松露」，睇嚟似乎幾有睇頭，當然好想知佢有幾厲害。幾款黑松露菜式中，最心水喺依道蒸豆腐，因為黑松露味濃，而豆腐則味清，好想試吓有無火花。其實賣相有少少心思，但製作上卻有啲粗糙，主要喺個豆腐做得巖巉，如果工整啲就更好睇 。賣相嘅嘢或許對一間茶記而言要求高咗啲，但豆腐唔滑卻實在喺一個事實，縱使蝦仁不俗，黑松露醬又帶出份幽香，始終對蒸豆腐喺有期望 。
蒜子枝竹冬菇炆盲曹 $78 同枱老友都喺好魚之人，又點可以唔點番一條魚呢？盲曹都比較少食，就要一碟蒜子枝竹冬菇炆盲曹。條盲曹都頗大條，碟上滿滿枝竹同冬菇，又腍又香，配合茨汁又幾惹味，最緊要魚肉入口挺實淨，唔會削霉霉，新鮮度足 。
蒜子蝦干魚鰾浸娃娃菜 $70 慣性動作，蔬菜類菜式又喺必不可少，十多款選擇，原來朋友喜歡食魚鰾，應屬少眾喜好，幸而小弟都啱食。魚鰾，平時晌街市叫開都喺魚肚、魚卜，因為帶有腥味都較少人買嚟煮，對比起由大海魚嘅魚鰾製成矜貴嘅花膠又不可同日而語。難得碟魚鰾處理得唔腥，配合蒜子、大粒蝦乾、薑蔥等配料，又以魚湯入饌，整體味道鹹鹹鮮鮮 。反而，墊底嘅娃娃菜晌依道「菜」式成為咗大配角囉！
黑松露蛋白海鮮炒飯 $60 上述個黑松露蝦仁蒸豆腐令大家有所失望，而個黑松露蛋白海鮮炒飯就稱得上刮目相看。首先個飯炒得爽身唔油已過咗第一關，其次，飯粒混和唔少蝦仁、蜆肉、魷魚、蛋白碎、蔥粒、菜度，口感豐富；加埋黑松露醬嘅「味力」，每口都滲出芳香，值得推介嘅炒飯 。
因為飲品有半價，無理由仲喺奶茶、咖啡，雖然奶茶一向喺啲茶記嘅強項，但見到有新嘢就不期然想試吓。
多田紅豆冰 $12（正價$24） 咩叫「多田」？原來即喺加咗阿華田，似乎幾特別。大大杯紅豆冰面加咗好多阿華田，攪勻之後，又即喺凍華田紅豆冰，其實飲落又唔算好特別，叫做一杯嘢有兩種口味，又有凍華田飲，又有紅豆冰食，心理上覺得抵咗，哈哈 。
米飯班煮個別菜式做得不俗，穩打穩紮，個炒飯亦甚有驚喜，不過，仍有啲地方需要改進一下，好似個豆腐咁，真喺嘥晒啲黑松露醬架！整體評價介乎OK與笑之間，但暫且俾住個OK先，希望下次再幫襯時，俾到個笑佢 。
張貼
