喜鍋 海鮮.點心.活刺身 蒸氣石鍋專門店 (已結業)

蒸氣石鍋而家開到周街都係, 但係質素各有參差。今次去到尖沙咀嘅喜鍋, 可以見證高質素海鮮石鍋好食之處。餐廳內魚缸放滿生猛海鮮, 見到靚食材, 又有醬油、蒜頭等配料, 都預視今晚會有幾豐富、幾好味。先要左一隻南非開邊龍蝦, 用蒜茸一齊去蒸, 更加突出海鮮嘅味道, 而肉質爽口彈牙, yummy!! 南非鮑魚用上蟲草花調味, 啖啖肉, 質感又夠鬆軟, 易嘴饞, 唔需要點醬油都足夠滋味!順德蒸污糟鮮雞同樣非常好好味, 同紅棗冬菜一齊蒸, 味道非常足夠。而雞肉嫩滑、肉味香濃, 絕對值得一試。百花釀遼參, 海參之中釀入蝦膠, 口感特別! 蝦膠本身已經非常彈牙, 海參則軟滑, 兩者感覺非常合拍。伊麵同埋梅菜蒸芥蘭, 伊麵麵條嘅軟硬程度適中, 跟梅菜蒸芥蘭一同去蒸, 亦都非常滋味。最後有個淮山魚肚蝴蝶腩粥底, 將材料放係電熱窩嘅底部, 加上湯底, 再加上整晚蒸海鮮嘅精華, 至為最佳享受!