王牌冰室 (南豐紗廠) (已結業)

成日睇到人去南豐紗廠影靚相，終於今個週末都同朋友去左。影相之後當然要醫肚，我地就去左呢間好多人排隊又新開張既冰室，店內裝修都好有港式味道。我要左個常餐，首先會有牛乳炒蛋同多士，麵食方面揀左佢地既王牌特濃沙嗲牛肉麵。特濃真係冇講錯，沙嗲醬份量又多又濃，多到好似食沙嗲醬撈麵咁！但又唔會太鹹太稠，配合得相當好，勁好味！而牛肉亦值得一讚，份量多，大大片，無筋又唔硬，相當出色。朋友就要左個蒜香生炸雞翼撈公仔麵，呢個撈麵就用左豉油汁加蔥，個人認為可以重味翻少少。而雞翼就炸得好靚，夠香脆又唔會好油膩，入面仲夠哂juicy。我地仲要左個西多士share。西多士可以選擇芝士/花生醬做饀，我地就揀左後者。花生醬份量岩岩好，西多亦炸到金黃。加埋滿滿既糖漿，邪惡首選。飲品我地就選擇左去隔離既王牌冰茶飲奶蓋。我要左個黃金芝士奶蓋東方美人，估唔到鹹蛋黃加咗入芝士奶蓋之後會個種鹹香更增加，而且東方美人茶濃度啱啱好，兩者好配合。而朋友就要左杯焦糖奶蓋觀音王，奶蓋加咗焦糖之後有份焦香同埋脆脆地，觀音王入口亦好醇香。仲可以拎埋兩杯奶蓋飲品入餐廳舒舒服服咁坐低飲，呢個設計真係非常好！