靠得住粥麵小館 (克街)

營業中

休息中

已不止一次聽說呢度的粥唔錯，食友亦推介，加上LI兄的食評，就趁今日要落灣仔搞D私幫野的時候，叫了朋友來試一試。一點到來，好多人，要在門口派飛等問號碼，都要等十分鐘，幾旺場的。當然是要搭檯，望左望右，油炸鬼別處交來，不吃也罷。見魚腩及豬潤都對辨，但又有拆肉泥鯭粥，自從天樂里真滋味執左後，已久沒吃過好的泥鯭粥，好在拉埋個朋友來，可以試多幾味。結果叫了泥鯭粥及魚腩粥各一，灼魚片同一碟淨豬潤。先講粥，粥底夠熱，綿滑，帶鮮甜味，見其貼在牆上的報導說粥底用魚湯煲的，吃落是所言非虛，味精當然是沒有。泥鯭粥用的是小泥鯭，沒有骨但有幾片鱗。魚肉甜美，但肉質堅韌，似乎是過了火位，或浸在熱粥內過熟了。不可說失望，但始終以前真滋味的拆肉大泥鯭粥是最好，不知這裡有幾人吃過？魚腩真的是大大舊，又幾多，魚肉肥美嫩滑又鮮甜，係好掂！下次來可以試魚骨及魚咀了。灼魚皮都不少，醮上混有薑絲及蔥的醬油，口感爽脆，喜歡吃魚皮的亦不可以錯過；碟豬潤份量不少，片片都厚厚的，爽口又鮮味，個人覺得如果想試豬潤，就一定要叫淨豬潤，因為浸在熱粥內會過熟，太熟的話，口感就差得遠。幾位招呼的服務都好好，尤其門口編位的阿哥，是好殷勤，值得一讚。