糖百府 (已結業)

自從近幾個月「糖百府」引入台式雪花冰後，帶起了台式雪花冰的熱潮，一直都想試試，但始終未有食過。前兩日終於在晚飯後來到來一個飯後甜品。哈，今次都幾好彩，一入到去就有位（因為食食下外面已經有人要等位）。坐低之後，因為只係第一次試，唔肯定係咪真係好好食，所以只係叫左一個雪花冰兩個人分享。呢次試嘅係「番石榴雪花冰」（上次睇電視見蘇絲黃好想食都無得食，賣晒，今次既然有得食，一於試下呢個先，下次先試其他味道）。因為有人話散叫比起套裝雪花冰抵食d，又可以自己揀配料，於是自己加料，除左「番石榴雪花冰底」外，仲加左藍莓漿做topping、仲有粟米片、芒果、菠蘿椰果同咖啡凍做配料添。話咁快，一大兜堆得高高，令人食指大動的雪花冰已經上桌。一試之後，感覺果然好味！冰凍的的雪花冰，帶著清新的番石榴味，混合甜甜地的藍莓漿，加上偏酸的芒果粒、咖啡味濃濃的咖啡凍和脆口的粟米片等配料，在盛暑之下，的確令人心曠神怡，帶給人透心涼的感覺。正！一於試齊所有味道，睇下邊種味道最正先！