樂湯雞麵館 (登龍街) (已結業)

每次行經登龍街，都會喺呢條美食雲集嘅街道見到呢間餐廳出邊排咗堆人喺出邊等入座或者外賣，所以一直都想搵機會試🤭今次終於係天氣變凍又心思思想飲番碗熱雞湯暖暖個身嘅時候嚟咗食晚餐😋要出街飲到碗冇味精嘅湯唔係咁容易，但係依度嘅雞湯大大隻字標明真材實料冇味精，而且連住個砂鍋滾住咁上😍砂鍋花膠雞有兩大片花膠，仲有啲魚翅。桃膠雪燕椰子雞就有好香嘅椰子湯底味。兩款湯底都係好清好香嘅雞湯味，而且仲有少鹽少糖選擇，夠晒健康。另外仲加配咗半隻花雕醉雞，調味好香濃，上面仲有啲蟲草花同埋枸杞，隻雞大大隻好多肉，好適合需要補充蛋白質嘅人士👍🏻總括而言，屋企冇煲湯又想喺出面飲番碗冇味精嘅湯嘅話，呢度都係幾好嘅選擇。