四季文昌 (已結業)

四季文昌今晚約左同事去公司附近試新野，成日行過見到四季文昌幾正，今晚終於book左黎試下！ 鋪頭牆上裝飾都幾靚，好有書卷味！叫左個6人份既竹笙椰子雞套餐，個餐樣樣都有d，都幾抵食！ 三文魚拼北寄貝刺身，冰震上枱慢慢食都唔怕變壞，三文魚切得唔厚唔薄岩岩好，色澤好靚，食落好肥美好新鮮，北寄貝大大片都好鮮甜好味！ 一級臘味芋頭煲仔飯，臘肉蔥花芋頭切得都細細粒放上飯面，大大煲賣相都覺得好吸引，芋頭好香又淋，又似食緊糯米飯，又冇糯米飯咁濟，加埋特製豉油撈埋一齊食好惹味！竹笙椰子雞，一打開勁香椰子味，椰子味完全滲入晒落d雞度，雞肉嫩滑唔鞋口，又大大鍋好好味！ 黑豚腩片，薄薄一片片，滾兩滾就食得，肥瘦比例岩岩好，肉質好嬾滑好淋，索埋椰子湯底味更加好味！