麻王 (已結業)

睇網上介紹話麻王好正，我都真係想食好耐了，咁啱早幾日係灣仔有野做，終於有機會去試一試佢。麻王所處位置有些少難搵，係嚮條巷仔入面，我地唔熟嗰頭，兜咗路，去到嗰時仲有唔夠半個鐘佢地就要收舖了，好彩大啖啲食快啲，都係趕得切堂食的。之前上網啲覺得最吸引就係佢嘅自選式麻辣燙，有淨餸揀，啱晒想避開粉麵飯嘅keep fit人士同低碳一族，我就係揀呢個嘅。最得我歡心嘅係啲萵筍，估唔到清香撲鼻嘅萵筍同麻辣竟然好夾，個豬紅都好嫩滑惹味，但其他配料就還好，冇話比到好深印象我，不過個湯底極正，雖然油咗啲，但啲麻味食到我好爽，bb辣又唔會太over ，所以氣管都係舒服嘅。男友個水煮牛肉就再好食啲，跟一碗白飯，我試咗少少，香到我都忍唔住破戒食咗啖飯，好滿足。