Amitie Kitchen (已搬遷) 新店位置

一家3口為食🐽又出動，今次過左尖沙咀搵食，等大帝放學就搭巴士去尖咀再經隧道過去。餐廳就係捷利商業大廈8樓，我地都好肚餓叫左幾多野食。餐包有幾款都烘熱左，麵包鬆軟，牛角包幾香牛油味。6道風味餐有1杯紅酒，幾香醇亦易入口。迷你海鮮盤有青口，蜆，蝦，螺每款1件，每樣都好鮮甜又嫩好味。香煎法國鴨肝煎得剛剛好唔會老，外脆內嫩滑亦無腥羶味檸檬青檸雪葩酸酸甜甜凍冰冰好醒胃亦好清新。莧菜芝士意大利雲吞配黑松露忌廉汁，好香濃松露味配埋芝士雲吞幾好味。主菜揀左美國羊T骨肉質幾嫩唔會乾柴，有少少羊羶幾好食。另外叫左個set dinner要左大蝦甜橙茴香沙律，汁甜甜酸酸，沙律菜新鮮，橙好甜加埋茴香是日餐湯係蘑菇湯好香菌味，味道亦好。炸蠔2重奏意大利麵炸蠔外脆內嫩又多汁，意粉有彈性個汁有鮮味，唔知係咪用蠔汁去煮?仲叫左個阿根廷紅蝦配柚子醬油，紅蝦新鮮有甜味但個汁唔似柚子醬油反而似蒜味醬油。最後個6道風味有梳乎厘但當日無所以可以轉其他蛋糕，我揀左特濃朱古力蛋糕，好濃厚朱古力味亦好香滑，好正。餐廳裝修簡潔，侍應姐姐們都幾nice, 會同大帝傾下計。幾多情侶同三五知己黎食。