影片
更多
2012-10-13
728 瀏覽
一個月一次嘅細胞小組活動又嚟喇，因為其中一位組員昇叔叔喺柏景灣會所會員，我哋一班人拉佢衫尾一齊入會所玩番日，訂場打乒乓波同「篤士碌架」，講開篤波，我哋勁業餘都未到呀，成個鐘先勉強打完一局清晒枱上嘅波，何其水皮，不過，志在娛樂，邊打邊吹水，而小朋友又可以去兒童樂園嗰邊玩，總之搵個平台郁動吓，閒聊吓，唔使齋講咁寡。晚飯繼續由昇叔叔安排，佢話奧海城三期多咗嘢食，所以，一早訂好位去食賣京、川、滬、杭菜嘅霸王山莊。自荃灣店結業，我都不知幾耐無嚟過！環境方面裝修幾雅致，淺墨綠襯白，牆身有啲白色通花圖案，仲放有幾部大電視，不過有畫面無聲，始終中式酒家都喺嘈啲。而枱凳都排得有少許逼夾，出入小心。阿靚仔經理一埋嚟就推介個「晚市信用卡優惠套餐」，4位用，7道菜，折實$838仲要另收茶芥及加一，唔算好優惠啫，唔多划算。我哋6個大人1個中童1個豆丁，食量算叫計7個人，都喺散叫抵諗，可以叫番啲想試嘅菜。馬蘭頭伴豆乾 $65馬蘭頭漸漸成為人人愛點嘅上海前菜，馬蘭頭唔喺咩值錢嘢，但喺一道盡顯刀功嘅菜式，師傅切得好碎，調味方面帶少少辣，幽香中帶點刺激。不過，豆腐乾就顯然佔嘅比重太少，而且好細粒，所以食落去唔覺豆乾嘅存
晚飯繼續由昇叔叔安排，佢話奧海城三期多咗嘢食，所以，一早訂好位去食賣京、川、滬、杭菜嘅霸王山莊。自荃灣店結業，我都不知幾耐無嚟過！
環境方面裝修幾雅致，淺墨綠襯白，牆身有啲白色通花圖案，仲放有幾部大電視，不過有畫面無聲，始終中式酒家都喺嘈啲。而枱凳都排得有少許逼夾，出入小心。
阿靚仔經理一埋嚟就推介個「晚市信用卡優惠套餐」，4位用，7道菜，折實$838仲要另收茶芥及加一，唔算好優惠啫，唔多划算。我哋6個大人1個中童1個豆丁，食量算叫計7個人，都喺散叫抵諗，可以叫番啲想試嘅菜。馬蘭頭伴豆乾 $65
馬蘭頭漸漸成為人人愛點嘅上海前菜，馬蘭頭唔喺咩值錢嘢，但喺一道盡顯刀功嘅菜式，師傅切得好碎，調味方面帶少少辣，幽香中帶點刺激。不過，豆腐乾就顯然佔嘅比重太少，而且好細粒，所以食落去唔覺豆乾嘅存在。伴碟用嘅罐頭菠蘿同車厘子，感覺傳統、俗套。
鎮江肴肉 $72又喺另一道常點嘅上海冷盤，賣相唔算晶瑩，豬蹄肉同鹵凍比例亦唔平均，有啲豬蹄肉多，有啲鹵凍多。雖然喺做法有少許繁複，又煮又雪，但就似乎做得有啲馬虎，唯一喺份量較多，味道都仲可以，鹵凍唔錯，有啜牙嘅煙韌！
黃金四季豆 $72清甜嘅四季豆，以「鹹蛋黃」做成黃金衣，添上一分鹹香，其他朋友都覺得好食，只喺個人覺得炒嚟較濕，但仍然認為依個菜餸粥就最正。
冰糖小圓蹄 $158招牌菜之一，有人提議點依道「肥膩」菜，竟然幾個老友都話樂意奉陪，真喺大膽呀！侍應姐姐好合作，碟小圓蹄煮好先上枱俾我哋過過目，仲問使唔使影相，哈哈，依家實在太多人食餸前影相。再送上嚟就喺切好晒嘅圓蹄皮同肉，怕肥嘅可以淨食肉，唔怕死嘅就皮肉都食。味道頗濃，而且甜甜哋，淨肉嘅就幾鬆化，而淨皮食又唔覺太漏，唔似一口肥膏嘅感覺。
北京烤鴨 $288北京烤鴨算喺店中招牌，亦喺熱賣，見佢每枱剎有介事加插一張簡介就知啦，又講由來，又講食法。基本上要預訂，不過一般都預多幾隻做存貨，由於我哋食我早，食6:00pm，所以雖然無訂，都有機會即場點。
烤鴨現場即燒，燒好即時奉客過目，之後返廚房再起皮起肉拎過出嚟。隻鴨都幾大隻，烤得色澤金黃，影相時都感受到熱氣騰騰、香氣撲鼻。霸王山莊切法有異於北京填鴨或片皮鴨，前者皮連肉，後者主要食皮，而依度兩樣都有，碟中間主要喺烤鴨皮，圍邊嘅喺皮連肉，但都好唔同，斜切做成皮佔少許、肉佔多，不過整體賣相幾好睇，差唔多切晒成隻鴨，夠晒大份無呃秤。附上兩籠熱辣薄薄嘅餅皮，加埋蔥度、青瓜、甜鴨醬，捲住食真喺好滋味，濃香中有清爽。不得不提一點，啲餅皮原來有花餅紙一層一層隔住，唔會黐實晒，無得彈嘅細心位！
炒鴨崧（北京烤鴨二食） $50經理強烈推介，加多$50多味餸。鴨殼起肉切粒，加埋甘筍粒、紅椒粒、蔥粒嚟炒成一碟鴨崧，以生菜包嚟食，好多時食燒鴨跟尾嘅兩食菜，但估唔到隻鴨之前起咗咁多肉，依家都仲剩咁多嚟炒鴨崧喎。個鴨崧味道唔算好突出，但仍然惹味好食。
擔擔麵 $45碗就大大，不過份量唔喺好多，每人一炷都夾晒喇。個擔擔麵本身喺辣嘅，但喺個侍應見我哋有小朋友，建議辣油另上，真喺細心，抵讚。除咗少少肉燥，就無乜料，主要食個湯味，湯色幾濃，幾有花生、麻醬香；店家有三款麵條選擇：幼滑、粗豪、黑金剛，而我哋選上「黑金剛」，入口滑溜，煙韌有嚼勁，有啲似幼身嘅蕃薯粉，幾得意，不過掛湯力唔強，配擔擔麵喺美中不足之處。
青菜嫩雞煨麵 $49又喺麵多料少，嫩雞寥寥無幾，還好嘅喺味道唔錯，雞質很鮮嫩；湯底雖然呈奶白，但比較稀，無咗煨麵嗰種濃漿感，至於麵條選要「幼滑」，麵身幼細如上海麵，口感柔滑。
小食喺醬油香菇配雜豆同西芹豬耳絲，比一般酒樓嘅花生酸菜多點心思，而且味道唔錯，前者香濃，後者爽脆。不過，喺斷位計@$5位，好似有啲搵老襯，因為你咁寫真喺唔知你會俾幾多碟小食嚟。而茶位收@$8，都喺合理價位，加埋一，成餐飯都喺$980，甜品都食唔落，都算抵食！張貼
