辣辣屋

營業中

休息中

琴晚同朋友嚟到粉嶺聯和墟呢間食烤魚嘅辣辣屋。可能因為係平日嘅夜晚，所以人唔算多，坐得幾舒服。佢餐牌上面有咖喱，但因為呢度嘅主打係烤魚，所以我同朋友就揀咗一個冬陰功烤魚。比着平時熱愛麻辣嘅我一定會揀麻辣口味，但因為身體緣故同埋朋友唔食辣所以呢只係揀咗微辣嘅冬陰功口味。條魚本身份量都好驚人，魚肉厚實，上面擺咗一對我最鍾意嘅芫荽，入面有菇、洋蔥等配料。一飲啖湯，冬陰公嘅香料味好出，好似去咗泰國咁。加配配料方面我哋只係叫咗薯粉，但個份量都大到嚇親我哋。嘢飲方面，我哋就揀咗水果茶，個水果茶並唔係一杯杯，應該用一揸揸去形容，個份量應該唔係for一個人掛。。。小食方面，我哋揀咗蒜蓉燒茄子同埋一口甜薯，值得一提嘅係一口甜薯喺燒完之後，個皮變得有少少煙韌，冇平時食火鍋放題配料咁淋同濕，好味，值得一試。