M Kitchen (已結業)

荃灣一向多好野食，今日就揾到間又係又好味又抵食，叫做M kitchen，見到平日晚上生意都咁好，就知道佢好受附近街坊歡迎啦。望望餐牌，平均都係一百蚊左右，都好多款揀，就入去試下～首先我地叫左個雞塊，份量好多！個醬勁惹味！雞塊好feel到係即炸，好脆口，但又唔會話太熱氣，好味～點醬食完美～之後就到主菜啦，火焰茄汁豬扒飯，本來都唔知會係點火焰法，原來係有表演睇！真係成個飯有個火焰包圍住，值回票價～味道方面，茄汁芝士都係做得好好味，酸甜適中，勁岩我口味～好味～豬扒質素都好，唔會硬/乾（好多地方都係衰係度！），呢碟好味！豬肋骨都好有驚喜！係骨肉分離既切感！feel到佢既肉一定好嫩滑，食落都無失望，果然好軟滑～絕不鞋口，呢個價食到呢種豬真係不得了！味道都調得唔錯，不過如果另外再上一碟仔bbq 醬比我就更加滿足到我呢啲重口味既人啦！最後有甜品，曲奇味雪糕配紅豆蓉，紅豆好高質，感覺係日本果種甜味好夠既紅豆蓉，好味！我地另外叫左兩杯特飲，奶昔既口感比較似沙冰～個人覺得食物比飲品精彩～每樣食物都好味，滿足嘅一餐！