泰潮 (已結業)

早幾日去機場接機，預左親戚落機係食飯時間，不如食埋飯先番屋企，本身都有幾個朋友做機場，佢地介紹我食泰潮。地理位置黎講，泰潮係T2，仲要行得好入，如果唔係朋友話我知，我都唔會特登兜過黎，亦可能因為咁，人流不多唔洗排隊。鹵水拼盤配湯河，送左一小碗湯，鹵水拼盤有大腸，豬肚，豬手，鹵水蛋，都幾好餸，呢個泰式鹵水汁味道正常，不過不失，不過我比較鍾意中式鹵水汁嘅味道。另外叫左個蝦醬炒飯，呢個炒飯令人喜出望外，一試難忘，蝦醬味道夠曬鹹香，仲有啲蛋絲肉碎，食落覺得好香有鑊氣，有微辣，我鐘意食辣就稍嫌唔夠辣，上面果啲腸味道同豬肉乾類近，呢個炒飯係極力推薦！一個飯都係60蚊左右，幾抵食！之後問番做機場嘅朋友，佢地都話呢間嘅炒飯係好好食，我下次過黎會再試其他炒飯。