潮州冷小炒 (已結業)

今天船河日，order 左 HKD3000 大元既日式到會，廿幾人張所有食物清除，渣都無得剩 ~ 六點落船大家玩左成日已經又餓又睏，咁大埔既團友一行六人就即飛的返去搵食 ~ 美女要求由我決定幫襯邊間飯店，食廣東菜唔要打邊爐，仲要一定好食 ﹗烚時間好鬼大壓力添，咁就帶佢地黎潮州冷小炒試試啦 ~ 好采飯後大家都好滿意啫 ﹗滷水鵝片，招牌菜無得彈 ﹗連各路食家們都棟起手指公讚好 ﹗肥美滷水鵝炆得入味，身材夠 fit，無多餘肥膏。質地滑溜非常，肉汁豐富，正抖。配甜醋開胃，配辣椒油惹味醒神，同樣好食。滷水大腸，真係咸左啲喎，跟鵝片味道差好遠，可能大腸吸味特別強。得層皮，口感太腍無趙口，亦無大腸皮彈牙口感，做炸大腸或釀糯米會比較適合。馬拉盞炒通菜，炒功一流 ﹗好搶手既一味，轉個頭就蒸發左咯。好有鑊氣，炒都又香，通菜鮮爽翠綠，味道微辣醒胃，馬拉盞份量剛好，不至有肥膩感成口油。仲有咩要求喎，夠晒喇。魚湯浸魚肚肉碎脆玉瓜，見到 menu 上有味幾特別既菜喎，好奇叫黎試試先，好采都唔算差，不過不失啦，大路穩陣。整體都好味，脆肉瓜新鮮爽口全滿水份。魚肚索盡魚湯，帶有淡淡咸香，跟清甜脆肉瓜同吃，既好味又特別。