蝦麵店 (蘭杜街) (已搬遷) 新店位置

原來蘭杜街雖然唔算好長，但係近皇后大道東呢個位，差不多成條街都係食肆，今晚阿仔想食東南亞菜，呢間餐廳主打蝦麵，原來檳城叫做福建麵，裝修都有啲馬來西亞簡約風，價錢亦大眾化。最抵食一人套餐，加埋小食及飲品都係$90左右。嚟到呢度一定要試吓蝦麵，我食得辣所以嗌咗辣味蝦湯蝦肉肉骨麵，一上到黎即刻聞到好重嘅蝦味，睇落仲以為好辣，實際上大約1隻辣椒辣度，排骨肉質鬆軟，肥瘦比例適中，蝦亦唔錯。福建滷湯蝦肉肉片麵，滷麵入口比較順滑，原來加咗一啲蛋漿同豬骨湯底，所以比較濃稠。豬骨雞湯魚片四寶麵，湯底多了雞肉甜味，亦比較清，接近傳統港式四寶麵。帶咗三個餐總共有三個小食，炸魚片算薄身，亦唔會太鹹，浸辣蝦湯之後食亦唔錯；沙嗲雞髀肉串，亦算正宗；五香脆炸豆腐豆卜，呢個小食放入湯之後食會更加好。白胡椒肉骨茶油條，好有馬拉風味。