富士山55 (拉麵沾麵專門店) (已結業)

豚骨沾麵平時就食得多啦，櫻花蝦沾麵真係未食過，送到黎嘅時候我哇左一聲，成個湯嘅表面都俾啲櫻花蝦覆蓋住，好似隻隻都係海中心對我揮手呼喚我食佢咁，本大爺一於唔客氣，夾起幾條麵浸落呢個櫻花蝦嘅蝦海，拯救一下佢地，佢地就好似搏曬老命咁抓住啲麵進入我個口，每食一啖都好似拯救左無數嘅生命咁。講番味道，櫻花蝦嘅鮮，麵嘅彈牙，湯底嘅濃，令我有溶入櫻花蝦一分子嘅感覺，好有歸屬感。食完之後我仲追加左個芝士飯加落啲湯底度撈埋一齊食，一滴湯一隻蝦都無浪費過，完全對得住非洲嘅小朋友。另外我仲加左個雞軟骨串，算係一個友情客串，不過不失，唔夠飽嘅時候當係小食都唔錯，不過其實我夠飽了