椰仔冰室 (屯門鄉事會路)

營業中

休息中

開正喺新墟新落成店住宅下面，對正v city馬路大街大巷。度度都叫冰室，唔係間間都做到冰室嗰種水準。冰室唔駛多款揀，但多數都做好專注做靚嗰幾款食物，水吧亦有番咁上下。一望餐牌呢間比較似茶記多於冰室。炒蛋，還好，保留番啲蛋汁喺度仲係濕潤；腸仔依然係嗰種餐記必用咁滯嘅廚師雞尾腸；蕃茄牛或沙嗲牛嘅牛都還好冇用過量鬆肉粉；加3蚊轉嘅牛角酥硬弸弸凍冰冰，眼尾望到隔離水吧擺左堆透明獨立包裝嘅牛角酥，多數都係工場貨，唔怪得。飲品冇特別香濃，自己嗰杯揀咗比較正氣嘅西洋菜蜜都好淡。食緊時成日有三四隻烏蠅喺附近飛或停留滋擾住，冇裝滅蟲燈。唔可以用冰室把尺度佢，用普通茶記就算，反正價錢算係平㗎喇。10點食完出大門仲見成堆人排隊等外賣等入座。