咖啡亭 (已結業)

Item: 咖啡亭
Rating: 3
Author: 奧志雷

Cafe Express

3.5

341 食評

味道

環境

服務

衛生

抵食

17693

尖沙咀

$201-400

多國菜自助餐咖啡店酒店餐廳

203

奧志雷

等級4

2.1K

地下大堂，等上 1 樓，呆。一向對自助餐好鬼抗拒，因為要自己出去搶野食，行出行入，又無人招乎，食物質數又麻麻地，比咁貴又唔係食得多，不如 order 好過啦 ﹗不過今晚係一大班朋友聚會，咁就無所謂。第一次黎，朋友提議一齊黎試試。咖啡亭聽落真係似 coffee shop，所以見到地方不算大，無金壁耀煌，亦唔會有驚訝感覺，裝修樸實大路，環境都幾舒服又空氣流通。因為 20:30 先可以起動，依家仲未夠鐘，大家暫時乖乖地坐定定呆住先啦 ﹗汽水任飲 ﹗久違了的自助餐，我一向都討厭自助餐、放題、任飲任食，見朋友仔生日同推介，一試無妨既 ﹗夠鐘 20:30 正開波 ﹗衝呀 ﹗殺呀 ﹗個個跑晒去輪即開生蠔，成廿幾人排隊，我啋您都傻，食住其他先。行個圈巡視一下，炆羊膝？﹗好香好大好靚啊﹗非常吸引，轉頭返您嗒您 ﹗自助餐羊膝做頭盤應該係唔錯既選擇，哈哈。矣？住係隔離既係泰式炒蟹播，賣相同樣出眾，轉頭搞埋您啦 ﹗白汁焗海鮮，好靚喎 ﹗有青口、大蝦、魷魚、等等。望左幾道菜，我似乎對自助餐既厭惡感開始減低，睇落幾好食呢 ﹗流口水喇 ﹗Round 1，第一碟先黎個炆羊膝，羊膝啖啖肉，我勁愛、好鍾意 ﹗炆得超級入味呀，質感腍而不散，嫩滑得黎有趙口，肉味濃帶點點羊羶味道，加上多種香料復習既配搭，好好味 ﹗有衝動想添食，但剛剛開始乍，要冷靜 ﹗白汁焗海鮮，賣相超靚囉 ﹗青口鮮甜爽彈帶肉汁，難得。大蝦好爽口呢，蝦味濃。魷魚就較為腍左少少，我喜歡彈牙爽脆。泰式炒蟹，行埋去已聞到勁香，個蟹鉗仲要好鬼大隻，足料無搵笨，炒得惹味香口 ﹗肉質嫩滑彈牙又多汁又鮮味，比我想像中好百倍，我仲怕會over-cook 添 ﹗頭 3 款絕對係超水準表現 ﹗係咪因為剛剛出爐，夠新鮮呢？期待著 round 2 既美食 ﹗嘆完第一碟美食，非常滿意 ﹗有質數、有驚喜 ﹗依度既自助餐完完全全比我多年前食既好百倍，打破我一向對自助餐既觀感，最衰依然要自己招乎自己，要出去攞野食囉。行到冷盤區逛個圈先，嘩 ﹗黑毛豬一定要試 ﹗仲有佢既絕配哈蜜瓜 ﹗有好多醃菜、沙律、生果同各類火腿呢。Round 2 ﹗冷盤黎喇，泰式無骨鳳爪，唔夠酸唔夠辣喎，口感偏腍，免免強強可以。泰式蝦仔帶子柚子沙律撈埋泰式生牛肉一齊食，雪藏蝦仔完全無味，一般乍喎。黑毛豬配哈蜜瓜，好美味呀 ﹗薄薄一片黑毛豬既咸香卷住甜甜多汁哈蜜瓜一齊啪入口，咸甜交錯，鮮甜甘香又特別，味道撞得漂亮。泰式札肉、豬頸肉平平無奇，一試無妨。消滅左 round 2 後，繼續下個海鮮冰鎮 zone ﹗長腳蟹、大蝦、青口、翡翠螺，我一定會帶您地返去既，請稍等。Round 3 喇 ﹗長腳蟹必食啦 ﹗殺殺殺，搶呀 ﹗雖然食落有少少雪味，不過話晒都係高檔食材，而且啖啖肉得黎又帶點蟹味，合格既。淡水龍蝦仔，天生淡口但肉質超級爽彈，配上自己喜歡既醬汁，係款不錯既美食 ﹗我會點辣椒仔或煮茄汁囉。大海蝦，應該係大路穩陣既選擇，味道好鮮甜，但肉質就好壞參半，部份爽口彈牙、部份霉肉腍劈劈。青口，同樣有點雪味，配汁食還可以。翡翠螺，普普通通，無意見。豉椒炒鴕鳥肉及焗青口。泰式炒椰菜，一向對依味麻麻地，考慮吓先。蔗蝦，梗係要食啦 ﹗去泰國飯店食幾鬼貴呀 ﹗Round 4 ﹗我越戰越勇，多啲黎密啲口 ﹗泰式炒蜆，廚師有 heart又偷懶喎 ﹗大大隻蜆原汁原味生炒，並無出過水，保持肉質肥美鮮甜，加上惹味醬汁，好味 ﹗蔗蝦，彈牙蝦膠味道香濃，更散發出清香蔗糖香味。不過炸得唔夠鬆脆，外層有點韌喎，可能放左段時間，依家都縮晒水哩。焗青口，麻麻地，焗到太乾喇，味道較為單調。沙嗲雞肉串燒，雞肉甜甜的，又未算太乾，不過不失。鴕鳥肉，嫩滑，依個 good ﹗椰汁燉燕窩大蝦，期待已久既招牌菜不設任飲，每人只得一碗 ﹗特濃椰汁牛奶湯底，淡淡椰汁清香唔會嗆，加上蝦油非常美味 ﹗蝦肉又爽彈，燕窩嫩滑，熱辣辣咁飲，正呀 ﹗泰式香葉比目魚，我好鍾意食比目魚架 ﹗魚肉白滑嫩口，肉汁澎湃，油脂勁豐富。外皮煎得香脆，仲聞到陣陣香葉味道，配泰式椰汁咖哩或就齋食都同樣美味 ﹗但係點解凍冰冰既？唔知係咪個火熄左呢，要扣分呀 ﹗好浪費 ﹗生菜包、印尼炒麵，雖然食自助餐最忌食粥粉麵飯麵包，但點都要試返一啖既。生菜包，炒得非常乾爽又香口，味道濃郁帶辣，用鮮嫩多汁既生菜包住一齊食，超正 ﹗如果係即叫即炒就更好啦，放係度已有段時間，只係暖暖地乍，鑊氣欠奉。依個都係其中一個我唔多 like 自助餐既原因，住好晒放係度，一係凍晒、一係 over-cook。燒羊架配泰式咖哩，好羶啊 ﹗都係剛才炆羊膝好味 ﹗沙嗲雞串，乾都驚死人，趙兩野 bye bye。香葉比目魚，配上秘製忌廉汁，個汁無味既？剛才都提過比目魚凍冰冰，滑就好滑，但真係無咩魚味，都係雪藏貨啦。香茅豬扒，放得耐乾晒嚕，咬落都係硬吓，味道合格既，但食兩件已覺得好滯。食完第 5 碟再出去逛逛消化一吓，預備再戰 ﹗再黎到海鮮區，仲有好多野未試呀 ﹗走到海鮮區最深處發現有位姐姐不停地開蠔喎，今晚有南非及美國，每人每次限攞 3 隻乍 ﹗南非生蠔，唔記得叫咩名喇 ﹗姐姐即開生蠔，都幾熟練快手架喎。南非生蠔味道較清淡，少少海水味道，邊位爽肉質嫩，短促 after taste 鮮蠔味，好快消失，都合格。燒牛肉配黑椒汁，牛味濃又超級嫩滑多汁，肉汁豐富，真係好鮮甜啊 ﹗黑椒汁香而不辣，不嗆而且仲帶甜味，非常滿意 ﹗真係好想再食多塊牛架，但係已食到飽飽地，仲有好多野未試呢 ﹗似乎今晚試唔到甜品喇，好飽 ﹗葡撻、蛋糕、麵包布丁、等等。食左 7 round 後，終於到刺生區 ﹗刺生只有 4 款，三文魚、油甘魚、雕魚及墨魚。三文魚刺生、油甘魚刺生同樣有質數，魚味濃又油脂豐富，香甜嫩滑，好味 ﹗已經好飽喇 ﹗仲有好多野未試添，試多次長腳蟹先，剛才食左鉗，未食腳呢 ﹗其實腳比鉗勁多肉架，真係幾好食，所以咁快要添食 ﹗一口芒果大蝦沙律，大蝦鮮爽甜，估唔到呢 ﹗加上鮮芒果粒酸酸甜甜，可以消消滯，推介。從未試過烤芝士，點都要試試 ﹗裝作需時，等等等。烤芝士，可以配脆條、多士或梳打餅。我第一次食，先試多士啦。聞落就好香，咬啖先。嘩 ﹗勁咸呀 ﹗我接受唔到囉。