小印度餐廳

營業中

休息中

星期六同朋友一行三人一齊去左食印度菜，”小印度餐廳”位於佐敦，地鐵站出幾分鐘就到，非常就腳。餐廳光猛，晚上時間都有唔少食客，座位闊落，坐得舒服。先有個小食脆餅，脆卜卜，配左個青色嘅醬，醬味道好清，中間有好微好微嘅辣。印度炭燒燒板餐嘅串燒雞，上菜嘅時候燒板D煙係一直咁冒出黎，燒板好夠熱。雞肉大大件,底墊左椰菜，蘿蔔絲，有幾片青瓜，擠埋檸檬汁，味道更加出眾。雞肉好嫩滑，仲好有肉汁，帶香草味，唔算係太濃味嘅菜式。而墊底嘅椰菜，蘿蔔絲吸哂雞肉肉汁，爽口好食。牛肉炒飯好乾爽，唔會好油,飯粒長形幼身，粒粒分明，食落口感十足。配料仲有D芫茜同蘿蔔，牛肉大件，唔係切到細細粒炒。牛肉炒飯同樣偏重香料味，好有特色嘅炒飯。瑪沙拉羊肉，瑪沙拉一直係幾鍾意嘅印度菜，多種香料混合之下，感覺每一間印度餐廳都有說不出嘅不同。今次食瑪沙拉羊肉，瑪沙拉質地結身，香料味重之餘食落有好微嘅香辣,點黎食芝士烤餅一流，完全停唔到口。羊肉煮得好入味，食落一絲絲，但唔鞋，亦冇羶味。芝士烤餅好煙韌，加埋芝士食落更軟綿綿更香。飲品叫左菠蘿香蕉拉昔，食到有D菠蘿碎，好香菠蘿同香蕉味。