一糖 (屏山)

營業中

休息中

收到風話菠蘿山可能會封，所以趁有時間就再行多次以免之後真係無得再去影相。本身諗住慢行一個下午，但點知落雨就影完相早早下山了，搭小巴返到天水圍見呢度啱啱開就順便歇下腳，醫下肚。落到山先黎出太陽，真係天公造美呢。但估唔到啱啱落完雨呢度都咁多人，唔計店內，淨係出面都有十多二十人坐左係度等食。牆身呢幅塗鴉一睇就知係打卡必影啦，畫得真心唔錯。同埋咁啱有幾個單車人黎食，所以兩架＂跑車＂做左幅畫嘅點綴。餐牌主打係紫薯，所以點左個紫薯窩夫同埋綠荼心太軟。因為即叫即整嘅關係，等下係無咩所謂的。雪糕球配左士多啤梨味的，因為心太軟係女友嘅至愛，所以佢見到都會一定點。整體唔會好甜，但綠荼味十分香濃。麵團偏薄同乾身，但因為綠荼餡夠多可以補足濕潤嘅口感。紅豆係綠茶嘅最佳拍檔，呢度紅豆煮得軟綿又入味，糖嘅甜完全滲透入紅豆入面，混和心太軟同忌廉真係絕配。紫薯窩夫真係超啱行完山食的，因為佢份量真係幾大。同埋佢絕對無額外添加過多嘅糖，全部都係由紫薯本身甜度所引出黎。紮實嘅感覺令一日嘅疲勞一掃而空，同埋窩夫入面都包左啲紫薯蓉，所以蕃薯嘅香味由頭到尾都好足。烘乾嘅紫薯片濃縮左香甜，同冰凍嘅紫薯雪糕糯米糍令窩夫增加另一種風味。