Couple's Kitchen (已結業)

早前見到網上介紹呢間餐廳，墨綠色嘅裝潢非常具歐陸風格，圓拱形門窗感覺典雅，今日經過終於有機會試下了。Set lunch有好多款式，包餐包、餐湯/沙律、主菜及飲品，亦可以半價轉特飲。是日餐湯係椰菜花忌廉湯，入口好creamy，椰菜花味香濃，配埋微甜嘅餐包，感覺好夾。黑松露雜菌薄餅 :傳統薄批上面鋪滿雜菌及芝士，上檯時散發出陣陣香味，薄批入口鬆脆，黑松露味好香，雜菌配埋濃濃嘅芝士，感覺濃而不膩。All Day Breakfast :All day breakfast可以話係好多人嘅喜愛，呢度嘅all day breakfast非常豐富，除咗有正常嘅炒蛋、煙肉、香腸、煙三文魚、炒雜菌、蕃茄及茄汁豆外，竟然仲有炸魚柳、薯條及金華火腿，將fish and chips融入all day breakfast，好有特色。炸魚柳炸得非常香脆，粉漿唔太厚，魚柳依然保持鮮嫩，配埋蜜糖芥末醬食更加開胃；另一令人驚喜嘅係金華火腿，鹹香味十足，估唔到配all day breakfast都無乜違和感最後飲埋有個靚靚拉花嘅Cappuccino，感覺份外滿足。