鳳城酒家 (已結業)

星期日，阿爸又話要去飲茶，由於都好耐無去，於是就順佢意去鳳城。鳳城點心唔多，唔似得其他酒樓咁多款式，而且以傳統點心為主。叫了幾款點心：炸魷魚鬚、蝦餃、鮮蝦腐皮卷、蔥花蝦米煎腸粉等。呢幾款點心算係比較好食，唔會太肥膩。仲有豬潤燒賣，唔係好多地方有得食，所以見到通常會叫。但呢度嘅豬潤燒賣，我俾佢10個差，舊豬潤同豬肉燒賣完全分離，豬潤非黃沙，勁鞋又無味。除咗點心，仲要咗個歡樂二人餐三個食。二人餐有乳豬+生腸, 冬瓜蟹肉羹& 吉列蝦球。乳豬+生腸招牌菜，水準之作，生腸好粗好爽口；乳豬皮脆又唔肥，稱得上係皮脆肉嫩。冬瓜蟹肉羹，讚讚讚！真材實料，有好多冬瓜絲，清清地；而且有好多蟹肉，而且新鮮；個羹底又唔會太杰，稀杰適中。吉列蝦球，無乜難度，但都好食，有個秘製酸甜醬，同炸蝦好夾！