九份•十分 (河畔花園) (已結業)

上星期難得約到個好耐冇見既朋友，揀左呢間近佢屋企既台式餐廳。之前都有黎食過牛肉麵，味道濃郁，感覺幾正宗，今次決定豪少少食多啲當慶祝下。當然台式餐廳必叫既都係牛肉麵，今次改叫三寶，牛筋牛肉同牛肚都唔錯，而且味道仍然好正宗，湯底食得出八角茴香等香料味鹽酥雞係呢間餐廳既招牌菜，上次一個人黎冇機會食，呢度係即叫即炸，個皮非常酥脆，就咁食都好正，仲可以自行加六種唔同既味粉，個人最鍾意原味同香辣，食到一半仲可以加梅子或芝士轉下口味，而且份量都好多，絕對可以四個人share食。蚵仔煎都係台式必叫，呢度改左少少整法多左蛋既比例岩香港人口味，蚵仔好大隻同喺台灣食既差唔多，醬汁既濃度都岩岩好，值得試下。為左滿足大食既朋友仲叫左唔少小食：麻辣牛展夠麻少辣，牛展都好爽口；滷水拼盤（小）同牛肉麵既湯底一樣有香料味，而且款式多，無論係雞蛋雞翼雞腎或是豬大腸都好入味，份量睇落小啲，但兩個人都夠食。唯一覺得可惜係最後黎既醉小三，雖然有酒香但唔入味，唔算特別好食。不過成餐黎講真係最近食過最好食既台灣菜，就算係我個住過喺台灣既朋友都讚不絕口，如果我住近啲既應該都會變成飯堂。有機會試下佢地既鐵板餐同珍奶。