川熙樓 (已結業)

今晚約咗個喺香港過境嘅內地朋友食飯 ，佢住喺尖沙咀嘅酒店。本來諗住喺佢酒店度接佢先諗食乜，但又落大雨所以就係佢酒店裏面嘅食肆 揀咗一間坐低咗。我朋友本身係湖南人天生就鍾意食辣野。呢間係川菜館主打火鍋同埋小菜，都係食麻辣嘢為主應該啱佢口味。我哋得兩個人打邊爐食唔到好多嘢，所以都係叫咗幾個小菜。個前菜晾衣白肉話咁快就上枱。果然冇改錯名喺將幾片青瓜同埋薄切嘅白肉掛咗喺個架上邊好似晾衫咁。青瓜加埋白肉沾上個辣椒汁，辣得黎又有青瓜嗰種清新口感呢個配搭唔錯。跟住上嘅就係口水雞,係辣同埋麻嘅口感。雖然係辣同埋麻，但係啲雞肉好滑。呢啲就係川菜嘅特色。跟住上嘅就係擔擔麵，食得出係好正宗嘅川菜 做法同味道因為我喺內地都食過。佢哋呢度嘅師傅應該係正宗嘅四川人。最後上嘅就係燒椒肉末烤茄子，我第一次食呢個菜。做法係將條茄子用炭嚟烤熟，再喺上面洒啲切碎咗嘅肉碎再加辣椒同孜然粉。個菜辣得嚟好香好惹味。呢度嘅小菜係正宗嘅川式做法，同埋佢哋有得食火鍋。如果鍾意食四川菜嘅朋友呢度值得推介。