正宗水上人氣鍋專門店 (已結業)

契妹要去旺角買泰國牌子o既化妝袋，honey聽到又話想跟埋去。兩大美人購物完畢就大叫肚餓，契妹仲話好想一試氣鍋 ，喺網上搜索咗一輪，最終決定幫襯連個名都正宗過人o既「正宗水上人氣鍋專門店」。幾層高o既「水上人」地下裝修得好似一個竹林咁，正門不但有流水，牆上更可見樹幹上有金銀雀鳥作裝飾 。大堂中央擺有多張大圓枱，坐滿一家大細o既客人。近牆則有一列二至四人o既卡位，連個燈罩都為竹造，越望越有特色。竹林一角放滿大大小小o既魚缸，可清澈地睇到不同種類o既海鮮喺藍綠色o既水中游黎游去，生猛又醒神 。晚上七點半鐘左右，店子已八、九成滿座，幸好一樓仲有卡位剩，我地一行四人啱啱好有得坐。食店o既理念全貼於牆上 ，食客喺等待食物蒸煮時可慢慢細閱。可能大家都深受殭屍電視劇所影響，日日睇見女主角都只會諗起「ABC餐論」，四人居然異口同聲地話要食「B餐」 。「B餐」共有八道餸，分別為波士頓龍蝦半隻、奄仔蟹半隻、象拔蚌仔一隻、白汁貴妃蚌一隻、黃金甲三隻、雪花肥牛二兩、金蒜蒸勝瓜四件及霸王西施粥 。眼見於Facebook讚好、分享及打卡有野送喎，我地就立即根據指示去做，好等落單時一次過俾埋哥哥仔睇。