DK1885 (已結業)

我真係從來未去過越南，但就好鍾意食越南粉。今日，呢間餐廳，令我覺得越南原來係咁嘅味道嘅。首先我哋嗌左個沙律，香草野菜燒牛柳沙律，佢個牛柳真係不得了，好嫩好腍，而且都好重牛味。啲沙律菜配埋啲撈檬果隻汁原來係咁醒胃咁fresh。然後就係帶咗個香茅魚露煮活蜆，佢啲魚露唔會太咸，跟埋個活蜆真係好鮮甜，最重要嘅係佢啲蜆真係非一般嘅大隻。一啖咬落去嗰種鮮甜爆汁嘅感覺，令人好滿足。之後我哋仲帶咗個香辣香茅炒藍貝，佢呢個藍貝係迷你版青口，呢隻青口係好嫩滑同鮮甜。加埋啲香草同埋辣辣地，真係好惹味，食到停唔到口。然後我哋就帶咗一個正宗越南菜式，魚露燒豬肉檬粉。點解我話佢係正宗越南菜式，因為佢個食法同我地平時喺其他鋪頭食到嘅撈檬係唔同嘅。佢上嚟嘅時候已經將檬粉變成一對對，好似一個個波咁。食法係首先將一個波嘅檬粉，放入自己隻碗仔度，然後再加埋幾更魚露同豬肉，再加一片青瓜同埋羅勒葉，再撈埋食。佢個豬肉燒到好香口，而魚露酸酸辣辣咁，好開胃。佢令我覺得，越南，原來係咁嘅味道嘅。