泰濃麵 (蘭芳道) (已結業)

好耐冇食泰國嘢喇😋 今次去咗泰濃麵嘅銅鑼灣分店，佢地招牌紅白藍色同泰國國旗一樣好易認，門口仲放咗好有親切感嘅篤篤車頭。泰濃麵標榜由泰國人主理，嚟到當然要食正宗嘅船麵同冬陰功啦！濃郁嘅船麵湯底喺我心目中一定係同牛肉最夾－餐廳有幾款牛肉選擇，我就揀咗推薦嘅頂級安格斯牛肉。半生熟嘅安格斯牛肉口感一流，軟嫩帶少少肥；船麵會跟白魚蛋同炸豬皮，浸過船湯嘅炸豬皮仍然好香脆仲索咗啲湯汁～至於冬陰功湯就梗係配海鮮最正啦！卜卜蜆鮮甜大隻，湯底另外仲有蝦、青口同蟹柳，用料幾足；冬陰功湯酸酸辣辣好開胃，會唔覺意飲埋啲湯～泰式小食拼盤即炸出嚟熱辣辣，我最鍾意係炸雞翼，香口得嚟又能夠鎖住肉汁，點泰式辣醬特別滋味。食泰國嘢唔少得泰式特飲，依度嘅龍眼冰值得一讚，清甜解渴唔會好甜，午市仲有跟餐優惠添👍🏻