十二味不只是烤魚 (已結業)

今日去黃埔行街，行行吓已經到黃昏，我最鍾意食辣野，所以行過見到呢間有辣野食，於是入去試吓。門口招牌係用光管切成，好吸睛，入面嘅裝修以方枱為主，有梳化卡位，都坐得舒服。呢間餐廳有烤魚同香鍋食，雖然好難抉擇，但見隔離枱食緊烤魚好吸引，所以就選擇咗烤魚。佢地有4款魚選擇，我地點咗比較少聽嘅清江魚，而味道就選擇咗招牌香辣味（小辣），條魚一上枱就香味撲鼻，條魚都好大條，有成個盤咁長，上面鋪滿辣椒同芫荽，首先試一試條魚，好滑一d都唔鞋，魚肉吸收晒d湯汁，好惹味，個湯汁唔係太辣，咁就冇覆咗魚嘅鮮味，食完一啖會仲想繼續食落去。而配料我地就點咗寛粉，放入湯汁入面煮一陣，好快就變咗透明，食落好煙韌，完全吸收晒湯嘅精華。仲有點咗鵝腸，煮一煮好易熟，好爽口，佢地好貼心清走晒d肥膏，所以食多幾條都唔怕肥。食邊爐梗係唔少得解渴飲品啦，叫咗杯熱情果梳打，勁大杯，酸酸甜甜好好飲，杯飲品好足料，有好多熱情果粒粒喺入面，加埋有汽嘅梳打，真解渴。