Chop Chop 食神叉燒 (新城市廣場) (已結業)

今日收工過新城市廣場，食Chop Chop食神叉燒嘅黯然銷魂飯。個個都係叉燒飯，點解會話係正宗黯然銷魂飯？一切皆因戴龍師傅係電影食神入面果碗黯然銷魂飯嘅創造人。正宗黯然銷魂飯材料簡單，講白啲都係叉燒、荷包蛋和米飯。但要好食一啲都唔容易。叉燒選用咗五花腩肉，肥瘦相間，滿口油香而唔膩。叉燒微微焦香，入口鬆化，淡淡嘅甜味過後，香醇玫瑰露酒由脷底滲返出嚟。非常好味。再點埋秘製叉燒醬，更加係另一個層次嘅味道。除咗叉燒，飯都好特別，我就唔識分米嘅品種、但感覺有陣木頭同茶葉香味。除咗黯然銷魂飯，仲點咗招牌干炒牛河、同埋鮮茄牛肉。招牌干炒牛河面頭鋪滿木魚，真係第一次見。而餐廳用咗較少見嘅粗身河粉，非常有口感。牛肉亦都好滑，整個干炒牛河都好夠獲氣。至於鮮茄牛肉，都好好食。牛肉什至比招牌干炒牛河嫩滑，蛋滑之餘好香蛋味。依道菜餸白飯一流。