1仔冰室 (已結業)

有少少趕時間過去尖東搵我朋友，朋友就想幫忙，順便幫手買嘢食，響紅磡區行過去途中經過1仔冰室就直接響度買外賣返去食。佢嘅地點應該係介乎黃埔站，同埋紅磡站中間咁上下，黃埔站行過去5分鐘左右就到。朋友就要做一個最基本嘅常餐，沙嗲牛肉通粉，配埋炒蛋，仲有個菠蘿油。沙嗲牛肉通粉食嗰陣時冇落晒啲湯落去，所以沙嗲牛肉味比較出，但係如果成個湯落晒佢就有少少偏鹹，通粉嘅口感正常。炒蛋有啲乾身。菠蘿油外面嗰浸脆皮有少少實淨，攞上手感覺個菠蘿油好似有個殼咁，咬落去就係外面硬硬地脆脆地，裏面有少少乾身。我就要咗個鹹牛肉蛋潛艇，份量正常，鹹牛肉同蛋嘅比例都可以，呢度蛋正常好多。整體來講發揮正常。