佳記餐廳 (已結業)

星期日行完山路過良景邨, 因為體力消耗咗唔少加上肚餓, 所以揀咗間比較就腳嘅佳記餐廳。下晝三點嘅佳記一樣好多人, 不過餐廳入面有好多二人座嘅卡位, 所以都唔洗等位, 一行入去就有位, 但座位有啲迫。一坐底就叫咗個下午茶set, set入面有一碟ABC醬豬軟骨炒飯再加一杯冬OT, 承惠48蚊。ABC醬其實係印尼產嘅醬油, 之前聽過有人去印尼旅行都會突登買返一支返屋企, 但我自己就第一次食。炒飯一上嘅時候已經聞到好重嘅醬油香, 但賣相就麻麻。不過每一粒飯都沾有醬油, 而且配料例如豬軟骨、蛋、辣椒同埋蔥粒都唔算少, 都算過關。食落去飯粒唔會偏軟, 個質感以炒飯黎講啱啱好, 但由於落咗醬油嘅關係, 個飯都係偏咸。豬軟骨切得比較大粒, 大細同keyboard啲制差唔多, 如果切細啲會更加好。如果唔食辣嘅話, 記得落單講定走辣椒。整體可以接受。凍檸茶都ok, 算係比較大杯, 質素就係普通茶餐廳嘅水平。上openrice先知原來呢間係連鎖店, 佢除咗餐廳樓面, 其實佢都有賣面包。有唔少包例如菠蘿包睇落都唔錯, 如果下次有經過佢嘅分店, 都會買黎試下。